د ملګرو ملتونو د وګړو صندوق په افغانستان کې د قابله ګانو د پیاوړتیا په برخه کې د پانګونې غوښتنه کړې او په هېواد کې یې باکیفیته زده کړو او سرچینو ته د هغوی د لاسرسي په تضمین ټینګار کړی دی.
دغه بنسټ په اېکس پاڼه د یو پیغام په خپرولو سره په افغانستان کې د قابله ګانو د پیاوړتیا په برخه کې د پانګونې غوښتنه وکړه.
د ملګرو ملتونو د وګړو صندوق ټینګار کړی: موږ باید د داسې چاپیریال په رامنځته کولو کې پانګونه وکړو چې میندې خپل حیاتي کارونه ترسره کړای شي.
دې بنسټ همداراز ویلي چې دوی د باکیفیته زده کړو لپاره د لارو چارو په رامنځته کولو، سرچینو ته د لاسرسي د یقیني کولو او د قابله ګانو د پیاوړتیا لپاره هڅه کوي چې په روغتیایي سیسټمونو کې فعاله برخه واخلي.
تر دې وړاندې د ملګرو ملتونو د وګړو صندوق ویلي وو، چې په تېرو اتو کلونو کې په نړۍ کې د زېږون پر مهال د امیندواره ښځو د مړینې کچه نه ده کمه شوې.
د دې سازمان د راپور له مخې، د امیندوارو ښځو د مخنیوي وړ مړینې ۵۰ سلنه په بشري بحران او جګړو کې ښکیل هېوادونو کې پیښیږي، چیرته چې هره ورځ په نړۍ کې۸۰۰ ښځو د زیږون پرمهال مري.
همدارنګه د روغتیا د نړیوال سازمان شمېرې ښيي چې افغانستان ‘په اسیا کې د میندو د مړینې تر ټولو لوړې کچې سره په هرو زرو ژوندیو زیږونونو کې ۶۳۸ مړینې لري.
په همدې حال کې په افغانستان او په ځانګړې توګه د هېواد په لیرو پرتو سیمو کې د میندو د مړینې د زیاتوالي او د نرسانو او قابلو د کموالي په اړه اندېښنې راپورته شوې دي.
د ملګرو ملتونو د اټکلونو له مخې، د افغانستان په لیرو پرتو سیمو کې هره میاشت ۲۴ زره ښځې زیږون کوي او دوی د اوسني بشري ناورین په ترڅ کې په ځانګړې توګه د قابله ګانو په څېر مسلکي نرسانو ته اړتیا لري.
URL تعقيب: https://www.ansarpress.com/pashto/31504
